"Янги Ўзбекистон китоб ва кутубхоналардан бошланади"
Турткул туман маданият саройи ҳар кунгидан ҳам байрамона безалган. Ранг баранг мавзуларда китоб кўргазмалари маданият саройига келган ҳар бир инсоннинг диққатини тортади. Жуда катта панода эса "Янги Ўзбекистон китоб ва кутубхоналардан бошланади" сўзлари битилган. Аҳоли орасида китобхонликни кенг тарғиб этиш, уларга маънавий маърифий, бадиий эстетик талабларга жавоб берадиган миллий ва жаҳон адабиётининг сара намуналарини "Маърифат улашиб" акцияси доирасида улашиш мақсадида викторина саволлари берилиши ва ҳозиржавоб 7 ёшдан 14 ёшгача бўлган китобхонлар, 14 ёшдан 30 ёшгача бўлган ҳамда 30 ёшдан катта бўлган китобхонларни китоблар билан тақдирлаш мақсадида "Эл азиз инсон азиз" шиори остида туман маданият бўлими, туман ахборот кутубхона маркази ҳамда Республика Маънавият ва Маърифат Маркази туман бўлими билан ҳамкорликда тайёрланган бу тадбирга Республиканинг кўзга кўринган шоиру шуаролари, олиму эл севган актёр ва хонандалари ташриф буюришди.
Маънавият фестивалининг бу нуфузли меҳмонлари Шоира Мунаввара Усмонова, Назира Матёқубова, актёр Алишер Отабоев шунингдек бошқалар юртимиз одамлари, табиати ҳақидаги ҳақида сўзлар экан, уларнинг самимий дил сўзлари тадбир иштирокчиларида катта таассурот қолдирди. Ўзбекистонда хизмат кўрсатган маданият ходими, "Саодат" журнали бош муҳаррири, шоира Мунаввара Усмонова ҳам Тўрткўл ва тўрткўлликлар ҳақида ана шундай илиқ гапларни гапирар экан, ҳурмат ва эҳтиром билан туман ахборот кутубхона маркази қошида ташкил топган "Онажоним шеърият" клубининг раҳбари,шоира Мунаввара Юсуповага навбатни берди. Ахборот кутубхона маркази нинг фондни тўлдириш, сақлаш ва қайта ишлов бериш хизматининг ҳамда клубнинг раҳбари Мунаввара Юсупованинг клуб ҳақидаги қисқача шарҳи тингланди. Сўнгра клубнинг қизлари Абдулла Ориповнинг "Онажоним шеърият" шеърини хор бўлиб айтишди. Клуб аъзоларидан Шаҳзода Зарипова ва Шаҳноза Каримбоева Мунаввара Усмонованинг шеърларидан ифодали ўқиб беришди. Шундан сўнг адабий викторинадаги саволларга ҳар қайси гуруҳ аъзолари дарҳол жавоб қайтаришди. Меҳмонлар ҳозиржавоб китобхонларни китоблар билан тақдирлашди. Бундан ташқари улар шу тадбирда қатнашаётган нуронийларга, туман маданият бўлими кутубхонаси ва туман ахборот кутубхона марказига ҳам китоблар тақдим қилишди. Тадбир тамом бўлсаям бироз пайтгача, меҳмонларнинг дастхатларини олиш меҳмонлар билан суратга тушиш мақсадида уларни ўраб олишди. Демак, тадбирдан кўзланган мақсад кечада қатнашган ҳар бир китобхон қалбида бир ниҳолдай ниш уради энди....
